У межах тыдня навукі 24 мая прайшло выязное пасяджэнне студэнцкага навукова-даследчага гуртка кафедры этналогіі, музеялогіі і гісторыі мастацтваў гістарычнага факультэта БДУ «Museum».
Студэнты накіраваліся ў Глыбокае, каб пазнаёміцца з экспазіцыяй гісторыка-этнаграфічнага музея і яго навукова-фондавай работай. Падарожжа праходзіла пры падтрымцы ДУ «Нацыянальнае агенцтва па турызме», а таксама ў рамках праекта гістарычнага факультэта «Дыялог культур і рэлігій».
Выпускнік гістарычнага факультэта – заўсёды прафесіянал! Таму па шляху да мэты падарожжа студэнты адпрацоўвалі навык правядзення экскурсіі. Гэта была нялёгкая задача, бо інфармацыя ў шляху ўспрымаецца зусім па-іншаму, чым на аб’екце. Не ўсё магчыма ўбачыць, не ўсё паспяваеш расказаць. Кожны справіўся са сваёй задачай па-рознаму. Некаму давялося распавядаць пра этнаграфічныя асаблівасці рэгіёна, а іншым — пра падзеі Вялікай Айчыннай вайны (спаленыя вёскі Хатынь, Дальва, Шуняўка былі на шляху падарожжа).
Акрамя павагі і ўдзячных слухачоў, для якаснай працы над расказам быў яшчэ адзін стымул. У выніку галасавання студэнты разам з кіраўніком гуртка дацэнтам Дзянісам Філіпчыкам абралі пераможцу. Ім аказаўся студэнт 2 курса Сяргей Крачкоўскі. Ён атрымаў прыз ад Нацыянальнага агенцтва па турызме і гуртка «Museum».
З экспазіцыяй Глыбоцкага гісторыка-этнаграфічнага музея студэнтаў пазнаёміў выпускнік кафедры этналогіі, музеялогіі і гісторыі мастацтваў Ігар Фёдараў. Ён падзяліўся ўласным досведам працы ў музеі, падкрэсліў, што ўніверсітэцкія веды спатрэбіліся адразу, ужо ў першыя дні працы.
Наведаць экспазіцыю музея можа кожны жадаючы, а вось пазнаёміцца з фондамі — толькі прафесіяналы. Пасля экскурсіі мы накіраваліся менавіта ў фондасховішча. Там галоўная захавальніца пазнаёміла з умовамі, у якіх захоўваюцца музейныя прадметы. А вось сапраўды ўнікальная магчымасць для ўдзельнікаў выязнога пасяджэння гуртка адкрылася нечакана. Нам дазволілі патрымаць у руках сапраўдны артэфакт — адзін з маляваных дываноў самаго Язэпа Драздовіча!
Маляваныя дываны сталі пачаткам яшчэ адной важнай тэмы пасяджэння — захавання нематэрыяльнай культурнай спадчыны. Глыбоцкі раён з’яўляецца ўзорным у адносінах работы з такімі прадметамі. З практычным досведам у гэтай галіне студэнтаў пазнаёміла метадыст па народнай творчасці Наталля Нікіфаровіч. Яна правяла прэзентацыю элементаў НКС Глыбоцкага раёна, якія ўключаны ў Дзяржаўны спіс гісторыка-культурных каштоўнасцей Рэспублікі Беларусь, расказала аб практычным значэнні дадзенай работы, узаемадзеянні з носьбітамі традыцыі.
З нематэрыяльнай спадчынай і спосабамі яе захавання студэнты прадоўжылі знаёміцца ў першым у краіне доме рамёстваў. Народны майстар Беларусі Святлана Скавырка правяла майстар-клас па тэхналогіі стварэння маляваных дываноў, паказала майстэрні і характар працы ў гэтай галіне.
Экскурсія па горадзе спалучылася наведваннем самых вялікіх храмавых падзямелляў у Беларусі, якія на дадзены момант даступны для агляду. Цэгла-пальчатка, дахоўка, прадметы побыту і рэлігійнага культу — праваслаўны храм Нараджэння Маці Божай аказаўся сапраўднай скарбніцай матэрыяльнай культуры. Юрый Калбасіч расказаў аб асаблівасцях інтэр’еру, абразоў, гісторыі рэстаўрацыі былога кармеліцкага касцёла.
Выязное пасяджэнне гуртка «Museum» завяршылася падвядзеннем вынікаў, узнагароджваннем пераможцаў. Былі вызначаны новыя накірункі для навуковай распрацоўкі (будаўнічыя матэрыялы на беларускіх землях у ХVI-XVIII стст., традыцыйнае ганчарства, развіццё выцінанкі) і намечаны наступны музей для наведвання — першы і адзіны ў краіне Музей беларускай маляванкі ў Заслаўі.